 |
| Патриархия.Ru | 31.10.2005 |
Приидите, сынове освященнии со всеми православными вкупе, царие и князи, днесь, и вся благочестивых сонмы в веселии сердца, и душевную совесть очистивше, и истинною верою оградившеся, со усердием празднующе годовную память великаго сего и премудраго светилника и истиннаго благочестия проповедника, и пристанище волнующимся сущим в бури неразумия, утешителя и наказателя пребывающим в глубине уныния, паче же и печалным скораго предстателя, златозарнаго, необоримаго столпа, от земных ядр в небесныя обители досягшаго, и пламеннообразному и грозному престолу высочайшаго Владыки предстателя и служителя, пресветлую церковную звезду, на Востоце благочестия восиявшю, всея вселенныя благовестника, пречестнаго и премудраго евангелиста, Христова угодника, апостола Луку, достойно, сшедшеся днесь, да похвалим, песнь богодарованную ему плетущю, противу трудом его возмездие, от божественнаго разумения наставляеми, и похвалныя венца подвигоположнику простирающу днесь.
Кое убо благохваление принесем ти земнороднии? Ангела тя наречем, яко бесплотно житие во плоти пожил еси. Князя убо тя постави Господь всей земли и царя, благочестием сияюща во странах. Патриарха ли, яко Божию престолу наместник был еси Божия паствы.
Антиохом великое светило, и врача изрядна, человеческия немощи душевныя вкупе и телесныя, и недугом тлетворным и всяческим болезнем хитроловца и потребителя, и всемирное удобрение, теплейши, изящна ученика царя Христа, и пречуднаго проповедника Господа славы, и ревнителя суща всяческим Творца и Строителя, причастника же и наследника неразоримыя славы Небеснаго Царствия, неизглаголаннаго Божества, Святыя и Живоначальныя Троицы поборника, Отца и Сына и Святаго Духа приимшаго тайну и откровения недоведомых явления сказание.
Премудраго, святаго Евангелия списатель обретеся, паче же и Деяние святых апостол яснейше изложил еси, и посещением святаго ангела всяческую премудрость восприят, еяже убо твоими ходатайствы и нас сподоби наследником явитися, прославляющим тя святыми си словеси, дарованными от Господа Бога, и венчавшаго благолепия венцем, и прибегающих в пречистый твой храм премудраго врачевания, паче же и сослужащим святей ти церкви всяка благопотребнаго, прошения исполни и хотения спасенаго, благочестивых вкупе не отвратився, достодолжно святообразную память твою чтущих и прикасающихся верою честных ти и нетленных мощей, и укрепи и настави спасеному пути, и прослави славящия тя пресвятыми ти молитвами, и Царствию Небесному сподоби, и сыны света покажи.
Отныне, всеблаженне, украси свой праздник чудеси, удиви славно имя твое в последних родех, яко и преже, премудростию бо и чудесы одарован еси от Господа Бога Вседержителя, и разум небеснаго Царя приял еси в сердци своем, и распятаго Господа славы проповедал еси в поднебесней всем языком троическим разумением Единороднаго сыноположения, Пресвятаго же и животворящаго Духа озарение, неразделно исходящаго от Отца и почивающего на Сыне преславно.
Темже убо, о всеблаженный и вселенский учителю и наставниче погружаемым во тме невежествия, помяни нас убогих во святых ти молитвах, в Небеснем Царствии водворяяся в лице святых радования, у престола небеснаго Царя Христа Бога, и нам укрепитися в истинней и православней и непорочней святей вере до конца, в жестоцем сем и нужнем пребывании житейскаго моря, недоведомаго плавания, последняго времени, нынешних бед и падения избежати и ко благоугодному пристанищу притещи, твоим чудным и святым наставлением чистоты покаяние стяжати, и присносущнаго живота покоище обрести.
О, Луко всеблаженне, всечестный апостоле, премудрый и крепкий адаманте, прежде реченный златозарный и необоримый столпе, крепкая стена и необоримая забрала граду нашему, и всем православным помощниче! Моли убо избравшаго тя Господа, сотворшаго небо и землю, даровати мир вселенней, благовенчанным православным царем и благочестивым, благородным князем, вкупе и священноначальником со всеми преподобными во единении Православия утверждение содержати, и маломощных на путь спасения наставити, пленных обратити от руки мучителей Измаилтеския нужныя работы, и от нахождения поганых, безбожных агарян избавитися славнейшему граду нашему, и всякому граду и стране православных свободне быти от междоусобныя брани и прочаго зелнаго мятежа и нестроения!
Мы же убо сия по достоинству и лепоте приносяще ти сие грубое глаголание, вопиюще к тебе таковая: Радуйся, от вышняя премудрости восприявый сокровище от Святаго Духа сиянием! Радуйся, насеявый вселенную сладостными ароматы паче сахара и семидална хлеба пищею премудраго ти учения! Радуйся, обретый истинную премудрость в сердце своем Пресвятаго Духа вещанием и восприят нетленный и неувядаемый венец от руки всех царствующаго
Господа Саваофа Вседержителя! Радуйся, яко сподобился еси беседовати Пресвятей Богородице и Деве и Царице всем небесным силам, и преписати непорочный Ея истинный образ пречистаго благолепия подобие, и честный сан Господа нашего Иисуса Христа вкупе благообразно начертав! Радуйся, имже избыхом тмы! Радуйся, имже насладихомся света! Радуйся, избавивый мя от убожия! Радуйся, даровавый ми доброславие! Радуйся, имже пременихомся скорби! Радуйся, имже обретохом радость! Радуйся, всем нерушимое пристанище!
Темже и аз, многогрешный и грубый и недостойный, како возмогу достолепно, убогий, к похвалению язык мой просрети, но не красна похвала от скверных устен избранному верховнику от Господа Бога, понеже убояхся осуждения оного неключимаго раба, приимша талант и скрыша, а прикупа им не сотворша. Аз же, худый, елико возмогая, принесох ти, якоже вдовая она две цате, таковая вещая:
Лука — светозарная звезда, Лука — пресветлое солнце, Лука — пречестный Божию селению сад, Лука — благородная отрасль, напоиши благоухания вселенную, Лука — Божия истинный град и чудесный облак, Лука — небопарный орел, Лука — огнеобразная луча, истинный проповедник высокаго проповедания святаго Евангелия, Лука — крепкий сокрушитель неприязненныя льсти, Лука — твердый камень веры и теплый защитник. человеком, Лука — благодухновенный орган, вещая словеса святаго и премудраго Евангелия, Лука — добрый вождь в жизнь вечную, в нюже и мы, молимся, введи нас, совершающих честный твой и всесветлый праздник, в честь и славу Святыя, Божественныя, неразделимыя Троицы, Отца и Сына и Святаго Духа, ныне и присно и во веки веком. Аминь.
Текст приводится по изданию: Великие Минеи Четии. Октябрь, дни 4−18. СПб., 1874. Стлб. 1121−1125 (орфография упрощена).
