 |
| Патриархия.Ru | 26.09.2005 |
Поучение на Воздвижение Честнаго Креста
Днесь, братие, Крест Пресвятый воздвижется, разрешая прегрешения наша и всякое лето обновляя Воздвижением своим, и обетшавшая грехом сердца наша поновляет.
Тем бо Святым Крестом искуплени быхом от клятвы законныя, на том бо пригвоздися Христос Бог наш и рукописание греха нашего раздра, на том умертви вся прегрешения наша и соблажнения, того же даде нам Владыка и Бог оружие на противнаго врага.
Тем смерть умертвися и ад разрушися, тем Адам умерщвленный древле паки обновися, и Ева от клятвы свободися — древным бо вкушением бе испал [Адам] из рая древле, Древом же паки Крестным вселися в рай.
Того бо видевши смерть, вострепета страхом, и испусти яже бе пожерла древле — от перваго Адама до Того, Иже на нем пригвоздися.
Той бо есть наша победа, той есть наше оружие на противнаго. Тем знаменующеся, не убоимся видимаго и невидимаго врага. Той бо есть целитель страстей наших, той есть насыщаяй без труда верою сердца наша, той есть хранитель всем христианом и охранитель всем. Тем знаменаем мы все тело и брашно наше, и не приступит к нам зло — той бо напасти наша прогонит.
Темже, братие, того святаго Креста со страхом целующе и кланяющеся ему, отвержем от себе всяку злобу, ярость, гнев, клевету, лихоимание, студодеяние и пиянство — та вся диаволу повержем. Возлюбим мир, кротость, трезвение, нищелюбие, странноприятие, пощение и чистоту — то бо есть ангельское житие, теми бо делы вси правовернии спасаются.
Сию чистоту и подобныя ей дела возлюбим, да будем сынове Вышняго и причастницы Царствия Его, славяще Пресвятую Троицу, Отца и Сына и Святаго Духа, ныне и присно и во веки веков.
