Так и есть, Валерий, и вторая порция Соборного документа прошла не полностью. Вот его концовка.
С уважением, Леонид

А не многим глаголы стужати смеем, но точию даждь нам, Бога ради, по закону отеческия любви прощение и разреши нас от клятвеннаго греха, им же кляхомся в соборней и апостолстей святей церкви, в сий век и будущий: «и не быти (рехом) на нас милости Божии, и Пречистой Богородицы, и Московских Чудотворцев Петра и Олексея и Ионы, и всех Святых»; и ныне обращаемся и паки просим на ся милости Божии, понеже без нея не можем ни мало живи быти, и надеемся, по твоих молитвам, яко Бог, естеством сый благ, готова себе подает всем возвращающимся и просящим о прегрешении прощения, яко и за Ахава Господь сам к Пророку вещаше, глаголя: «не имам сотворити прежереченнаго зла, видех бо его, како сетуя ходить предо мною о своих согрешениих»; тако же, видевше Владыки Христа Бога нашего человеколюбие, и просим от твоея святыни получити прощение и прияти благословения и излития милости милосердия Божия благоверному Князю Василью Ивановичу всеа Руси, всем благоверным князем и боляром, и христолюбивому воиньству, и всем православным христианом».
И великий господин святейший Ермоген, Патриарх Московский и всеа Русии, велел соборныя церкви архидиякону Алимпию взыти на амбон; и как Алимпей челобитную прочел, и Иев Патриарх и святейший Ермоген, Патриарх Московский и всеа Русии, велели архидиякону же Алимпию на анбоне прощалную и разрешителную грамоту чести; правовернии ж християне, боголюбезнейший христоименитый народ, распространяюще слухи своя слышати надписания в прощалной той грамоте: и как архидиякон Алимпей прощалную грамоту прочел, множество же народа слышавше в грамоте свое виновное деяние и в сих винах милость и прощение получение, вси неутерпными слезами объяти быша, еже многую клятву и целование животворящаго креста преступиша; осмотривше же прилежне, еже на них происшедшее разрешение от клятвенных уз, вси радостию возрадовашася, припадше к стопам Иева Патриарха глаголюще: «во всех сих виновнии, о честный отче! Токмо глаголем прости, прости нас, и подаждь благословение десницы своея, да прочее приимем в душах своих радость велию.»
Прежебывший же Иев Патриарх, слышав таковое желание о прощении и разрешении всенароднаго множества, ото уст исходящее, глаголя им:
«чада духовная! В сих клятвах и крестнаго целования преступлении, на деяся на щедроты Божия, прощаем вас и разрешаем соборне, да приимите благословение Господне на главах ваших; впредь же молю вас, да не покуситеся таковая творити, еже крестное целование в чем преступати; велика бо есть сия заповедь, еже целовав честный и животворящий крест, на нем же Владыко наш Христос Бог волею сраспинаяся хотя нас избавити от мучительства дияволя; и вы, клявся и целовав тот же животворящий крест непоодинова, да впали в преступление.»
Народ же Московстии вси обещание на ся полагающе, отнюдь впредь таковая дерзати не хотяще.
Прежебывый же Иев Патриарх, и святейший Ермоген Патриарх, со всем освященным собором, простив всенародное множество, и разрешив, и благословение всем подав, отъиде в дом Живоначалныя Троица, идеже и пребываше по царьскому изволению. Православнии же християне вси разыдошася, воздающе славу Христу Богу нашему, еже сподобил их разрешение прияти от клятвенных уз и свою трисвятую милость получити, по своему предивному человеколюбию, аминь.
Выписано из Сборника грамот Смутного периода, принадлежащего Императорской Публичной Библиотеке. Л. 335-380.