Из Краткой редакции Устава прп. Иосифа Волоцкого: "Сказание от Божественных Писаний, яко не подобает в обители бытии питию, от него же пияньство бывает. Слово 9."

Подобает же убо прежде всех много попечение и тщание имети о сем, яко да не будет в обители, ниже в трапезе, ниже в келиях питию, от него же пияньство бываетъ. Аще убо и писана есть во уставех и в житиях Святых отецъ, еже иноком пити вино в подобное время, и вогда по чаше, овогда же по две, или по три, и имяху вино в всех монастырех и в первых и в нынешних, но до пияньства сего не пияху. Яко же свидетельствуют мнози человецы благородни, тако же и иноцы, бывши в константинеграде и в сей горе Афонстей и в иных тамошних местех, яко не токмо иноцы, но и вси православнии христиане пияньства ненавидят и гнушаются. Не токмо православнии, но и невернии пияньства отбегают и ненавидят, - вино убо вси имеют, от пияньства же, яко от тлетворного недуга, отбегают. Таков убо есть обычай земли тоя, и се есть неписан закон, земский обычай, якоже прежде рекохом; о Рустей же земле ин обычай и ин закон: и аще убо имеем питие пияньственное, не можем воздержатися, но пием до пияньства. А еже повелевают Святии отцы питии по чаше, или по две, или по три, сего мы ниже слышати хочем, ниже ведаемъ меру чаше чаша онех; но сицева мера наша есть – егда пияни будем, яко же себе не познавати, ниже помнити, множицею даже до блевания, и тогда перестанем пить. И таковаго ради обычая и погибельнаго нрава и грехолюбнаго навыкновения не подобает нам имети во обители пития, от него же пияньство бывает, яко да не в конечную погибель, блудный ров падем, еже от пияньства случается бывати. Богу нашему слава ныне и присно и во веки веков аминь.